អ្នកទេសចរនាំគ្នាថតរូបនៅមុខភ្នំភ្លើងបាលីដែលរៀបផ្ទុះ ខណៈអ្នកភូមិភ័យបះសក់
រូបថតរាប់រយសន្លឹកត្រូវបានបង្ហោះនៅលើបណ្ដាញសង្គម អ៊ីនស្ដាក្រាម បង្ហាញពីភ្ញៀវទេសចរមួយក្រុមដែលកំពុងថតរូបនៅពីមុខភ្នំភ្លើងបម្រុងនឹងផ្ទុះលើកោះបាលី ខណៈអ្នកស្រុកជាង ១០ម៉ឺននាក់ត្រូវបានជម្លៀសចេញដោយសារតែភ្នំភ្លើងកំពុងបញ្ចេញផ្សែងនិងផេះដែលមានកម្ពស់រហូតដល់ ៧៦០០ ម៉ែត្រទៅលើអាកាស។
អ្នកទេសចរជាច្រើនបានឈរថតរូបនៅពីមុខប្រាសាទ Lempuyang ឬហៅថា 'ទ្វារនៃឋានសួរ' ខណៈផេះនិងផ្សែងត្រូវបានគេឃើញហ៊ុយចេញពីភ្នំ Agung។ ហើយរូបថតភាគច្រើនត្រូវបានដាក់ចំណងជើងថា 'ម្ដងក្នុងមួយជីវិត' ។ អ្នកនាង Jill Powers ជនជាតិអូស្ត្រាលីបានប្រាប់ Daily Mail ថាអ្នកនាងបានធ្វើដំណើរមកកាន់កោះបាលី ដើម្បីទទួលបទពិសោធន៍ភ្នំភ្លើងដែលរៀបនឹងផ្ទុះដោយខ្លួនឯង។គួររំលឹកថា ភ្នំភ្លើង Agung បាននិងកំពុងតែបាញ់ផេះពណ៌ស និងប្រផេះទៅលើអាកាសជាងមួយសប្ដាហ៍មកហើយ ដែលធ្វើឲ្យភ្ញៀវទេសចរជាប់គាំងនៅលើកោះដោយសារតែជើងហោះហើរត្រូវបានពន្យារពេល។
Comments
Post a Comment